Étiquettes

, , , , , , , , , , , , , , , , ,


Couverture, 140 pages.

 (Pages : 17 à 21)

Tigira n mars 1933

Inna-i Sekku Azelmaḍ, imi-nnes izwa. Udem iwraγ amm tawda. Irwas win umettin:

– Seksew!

Beddiγ γef tfednin, greγ allen γer aneqqer d-tekka tallest. Ageḍrur izdey igenna d wakal. Issentel udem azegzaw n tafuyt. Izeggwaγ. Ila aḍu n tmettant d tfekkiwin ircan isḍiḍiyen. Ukiγ d udrar ar ittergigi ddaw yidasilen-inu d wul-nnes ar ittwaγ amm win uγilas ittutersen. Anniγ iwaγezniwen ar ttazzlan amm yinfalen. Igḍaḍ ar kkaten s wafriwen ur ssinen mani γer ttraran udem. Temḍerway g udrar.

Nniγ-as:

– Matta yixxan-a?

– Tamurγi! Ikabaren n tmurγi taberrkant. Aḍar iṭfar aḍar. Afriw ikkat afriw. Adida da issiwid. Axbac iγwma s yidammen. Ifassen da ten-suddumen. Iqqucan cwan amm yimegwran. Gezmen tasa n yimezdaγ. Sell i wakal-nneγ da ittwaγ ddaw titiwat n wuzzal. Timura γef tekka tenber-asent udem. Tenγa irban, tisednan d yiregzen. Tesγwas urtan trar medden d isemxan. Tamurγi n wuzzal. Tar ul. Tar tasa. S ugari, tra ad aneγ-tenbeḍ. Ad aneγ-tneγ. Tekref-aγ ifassen, allaγen d wulawen …

Ur yad da ttiselliγ i wawal-nnes. Ammi γifi yaggug. Griγ aγuyyi allig ṭṭaqqsen yiẓuran n ugerḍ-inu. Irar-i-d udrar tiqqlit. Irgag amm nek. Ul n udrar ilqaq amm win yimezdaγ-nnes. Gnunnin yiselliwen. Adida-nnsen irwas win tegniw. Ar ten-seksiweγ allig nn-aγen asif iγwban. Ftuttsen gen iberyan. Ammi nγan iman-nnsen. Skecmen tawda g wul-inu. Ur ssineγ maγ allig ggwdeγ ad frurin yimezdaγ amm yiselliwen.

Smaneγ ulli kessaγ. Annayeγ-tent duyent. Ar ttergigint ammi ẓrant uccen. Ṭṭukkint. Isdi-tent uγuyyi-nu immγen g wasif n tawda. Zdiγ tarula γer iγrem n Tana ad nn-sselkmeγ aneγmis.

Inna-i-d, imeṭṭi g yiles, tirrget g wul:

– Aḍar aεrab … Arkes aṛumi ! Nniγ-ak … Aεrab d Uṛumi!

Ur ukizeγ awal-nnes. Nek γas arba ameẓẓan ayed giγ. Γas ameksa. Ur ssineγ mayed msen Waεraben ula Iṛumiyen. Zdiγ tarula, idasilen-inu ar ttemneqqaren γef wakal n udrar amm yiḍarren n tmurγi.

Inna-i-d diγ:

– Williγ nin-d iysan d yileγwman. Wi yuwi-ten-d wuzzal. Maka amm wi amm williγ ! … Amm williγ!

Nniγ-as-d, imi-inu itkar s wakal d-ssnekrent wulli:

– Illa umuttel!

Inna-i:

-Illa yimenγi ayed izwaren!

Nniγ-as:

– Imenγi?

Teg akw tudert-nneγ γas imenγan!

Neṛmi asgunfu!

Iga ammi ur i-isella, inna-d:

– Assnaṭ, Aεrab. Assa, Aṛumi. S ugari d tkendawt ad degneγ baḍen. Yitsen kerfen-aγ ilsawen, ifassen d yiḍarren s udlis-nnsen. Wiyeḍ, ran ad asen-nessudum ifassen d tzukin. Nella ger yigenna d wakal. Nettyarna.

– Mek nettyarna ur ta nennaγ, i max ad tazned medden γer imenγi? Key trid uxla imezdaγ ad ttunγan tidired key.

– Xseγ ad aneγ-ibḍu wasif n yidammen nekwni d Yiṛumiyen akken ad ur sar ten-neṭfur!

Isawel-d ka agensu-nu. Awal-nnes iγwba. Inna:

– Asif n yidammen? Hat ibḍa-aγ yad d yinselmen. Han amata g yimezdaγ isul ittukraf s yikerkas-nnsen. Ččan seg yimkuraren-nnsen iqburen d yimaynuten. Zedγen-asen ifadden amm waṭṭan. Ssgerden-asen inelliten. Ur zmiren ad griwlen, ad swinegmen, ad bedden, ad mmectegen ula sawlen!

Zdiγ tarula γer iγrem. Isawel-d yan umeksa, inna-i:

– Mani γer tezdid tarula?

Nniγ-as:

– Tamurγi! Ikabaren n tmurγi! Kkan-d mayed igan aqqa. Γer iγerman-nneγ, zdin-d tawada.

Iduy. Iddem ar ireggwel. Ur issin matta tunant t-iwtan.

Aneγmis yaγ akw idurar d yiγerman n Ayt Yafelman. Irẓa uzbu n Ayt Σeṭṭa g Saγru deffer n sin yiyyar n yimenγi. Ugar n kumraw (40) n yisufag d tamraw n yigiman (80 000) n yiserdasen ayed d-tessenker Fransa mgal n sin n yigiman d tẓat n timmaḍ (2 900) n yinezbayen ilan γur kraṭ n timmaḍ (300) n yimrigen. Rwin-ten.

Ggzen-d Ayt Σeṭṭa seg udrar g kkan ssenfin. Knan. Dat Yiṛumiyen, sersen ifadden d yiyerriten γef wakal ammi da ttẓallan. Γerden mayed lan γef tmurt-nnsen sswan s yidammen. Aṛumi ibedda. Tiyenzar-nnes g yigenna.

Aṭas n yimezdaγ ayed ittunγan. Agari ičča medden. Isfeḍ amata degsen γef wudem n wakal. Timγarin d yirgazen zban allig rẓan. Ur knin. Ayt Σeṭṭa ur ğǧin knin i awed yan.

Inna diγ:

– Teγli tawda imezdaγ. Smattren ifeckan-nnsen, asin irden, timẓin, asengar d akw mayed lan. Zdin tawada s uzir γer idurar n Baddu d Ḥemdun. Uwin tiγeṭṭen, ulli, ifunasen, iserdan. Zrin iγerman-nnsen alin adrar ad rulen i Uṛumi. Tisednan d yicirran ffren g yifran. Iregzen smattren imrigen. Ggullan ttnaγen mgal n yiserdasen n Fransa ar tigira.

Inna-i ammi yannay tawda i-ikerfen anelli:

– Ul-nnek ilqaqen assa amm win unuguḍ, asekka ad idus. Ad yimγur. Ad idwel amm win uγilas … Ngum tin Bugafer, timiḍiwin d tmiḍiwin n Yimaziγen d Tmaziγin ayed ittunγan g yidurar n Waṭlas lumar g tin Tzegzawt. Tahamajiyt n Yiṛumiyen ur tli tilisa allig γalen medden is ur lin ulawen. Awed yat tewsit isarsen ifadden γef wakal min imenγi. Awed yan degsen iknan i Uṛumi. Zban allig rẓan.

Tudert n yimezdaγ tekkefrurey. Ur teswi awed iγef n tissegnit. G yitsen yiγerman n udrar, da settin Yiṛumiyen iregzen, timγarin d yirban, awin-ten. Awed yan issnen γer mani. Da zeddin yimezdaγ tawada ard ḍren s laẓ, fad d uṛmay. Awed yan d-ittuγulen. Wenna idusen, izbu, nγen-t[1].

Sseknan medden iγfawen. Ttyarnan. Ddren g timmuzdert.

Festiγ. Allen-inu mmγent s yimeṭṭawen. Ulli-nu iduyen ttint-i. Ur ukizent. Annayeγ tawda g wallen-nnsent ilan ini n yilmuten n Waṭlas.

Usiγ amrig-inu γef yiγir. Zdiγ tawada awed nek γer adrar n Baddu. Ul-inu innuγjef. Iγufa. Ira ad ibbaqqi zund agari.

Inna-i:

– Key tsuled tmeẓẓiyd γef yimenγan d ugari. Qqim idi g yiγrem. Nek ad sskareγ agari. Key ad t-inn-tessiwiḍed i yinezbayen.

– Waxxa!


[1] Aya issker-t ujiniral Manjan (Mangin) mi ttinin “Agezzar n 14-18” g Waṭlas Anammas. Kigan n yimezdaγ ayed inγa s yimki. Ittyassen s thamajiyt-nnes.

Publicités