Étiquettes

, , , ,


Tigira n dujanbir 1934,

Neffer g Tdafalt. Ku ass n ugdez ggzeγ γer Tinγir, fleγ-nn Umaxdac g taddart n yitsen yimeddukkal-nneγ γur neffer. Da ttekkaγ tasukin d yisaragen, kkeγ ammas n medden. Dinna kkiγ reẓmeγ imezgan ad isineγ acu ttinin yimezdaγ. Ad isineγ tineγmisin d-ttawin yibudraren d yimesdurar.

Tinγir tga tamdint tameẓẓant. Amm teglayt. Ineγmisen ittenyuddun ger medden, meqqar drusen, da zerrin seg yimi γer imejj, ard akw ttyissnen. Ku tikkelt, ar ttnadaγ mani g da ttγiman Yiṛumiyen, mayed ran, mayed ttinin d mayed msen yicekkamen-nnsen d mani g zedγen.

Yan wass, maḍleγ ad uγuleγ γer Tdafalt. Tafuyt teγli, asidd-nnes iḥri-t uzwu afessas d-ikkan anẓul. Udem n yigenna iqqen s tillas. Iṛmi. Tasukt d-kkiγ tetkar s medden. Tedwel amm teglayt. Kigan degsen beddan dat yan usasu ameẓẓan. Nmalaγ γer imi-nnes greγ tiṭ γer agensu. Ẓriγ-nn iserdasen n Fransa nitni d Waεraben, imxezniyen d Yisinigaliyen ar ssan aγisim. Taṭṣa-nnsen ar tessekmaḍ ul agensu n yidamren-inu. Ar i-tnebber adis d yiman. Qqimeγ ar ten-sniγiseγ. Llan mnidi. Ka da issa, ka da isawal, ka da itturar. Ka ibedda, ka iγwejdem. Qqimeγ ar ten-seksiweγ. Da d-tteffγen yiwen s yiwen neγ s tkabarin, zdin tawada γer teqcelt illan tama n usasu.

Aγuleγ-d γer iγrem, ul-inu ira ad d-inḍew. Nniγ i Umaxdac iγerden γef ugertil:

– Ixendallasen! Tarwa n yicentan! Iγed n Fransa!

– Ma k-yaγen?

Ulseγ-as mayed anniγ. Nniγ-as diγ: – Mmegrawen agensu n usasu n wuday. Kud ssan tteṭṣan. Mer ufiγ setγeγ ammas-nnsen ad ten-ssektutiγ!

– Ssmiḍ iman-nnek! Asekka nenker ẓarsen!

Ur akw gniγ iḍ n wass-nnaγ. Tameddit n usekka-nnes, ilsa Umaxdac timelsa n yimxezniyen, iles diγ γifsent tajellabiyt. Iffer amrig-nnes ddawas. Nek ttleγ agari i testawt-inu, lseγ γifes yan ujellabiy aqbur. Neggez γer Tinγir.

Ngula-nn. Asuk itkar diγ. Amm ku ass. Necceḍ ammas n medden amm tsaywalin. Ur da aγ-ittinniy awed yan. Agensu n yiγef-inu, γaleγ is ur izmir awed yan ad aneγ-yiẓiṛ. Tigaritin ur γiyent ad aγ-ssiγent acku tamentilt-nneγ tga tuγdimt. Idammen teskecta Fransa γef wakal usiγ- ten g ugerḍ-inu. Amm takurt n wuzzal. Tsettul. Medden gan dati amm yiselliwen. Nek ar ttekkeγ grasen amm yifiγer. Zliγ g yiswingimen- inu, ur ukiyeγ d Umaxdac allig i-inna:

– Ngula-d!

Nekcem γer asasu. Nufa-nn uday ibedda ar isawal i yan umsaγ γef watig n wulli g ugdez. Datas, γef tseggiwar, qqiman kuẓ n yigumiyen, yitsen yimxezniyen d yiserdasen iṛumiyen ar ssan. Seksuγ asasu hat ur γures γas yan yimi. Imeẓẓiy. Nniγ gri d yiγef-inu:

– Ad ten-nesγus amm yiγerdayen!

Γas iffeγ umsaγ, inniyeγ Umaxdac ibeddan, yuzen afus s ddaw tjellabiyt-nnes. Ildi-d amrig-nnes aṭumatik. Ur ssineγ amek iga allig t- id-ildey. Isares imi-nnes γef wul n ugumiy amezwaru as-d-ikan udem. Irẓem i wafa. Tenyadda tergagit amm tawda g tfekka-nnes. Annayeγ axbu iγza g udmer-nnes, idammen-nnes aγen akw aγrab d wallen-nnes ixsin dati amm tirget γef kectan waman.

Nniγ:

– Wiyha! Ur idd imki!

Inna-i:

– Wenna nn-teqqan tizi irfu …

Ldiγ-d awed nek amrig-inu.

Iwrerri. Inna i wuday, allen-nnes ḍufent kraḍ yiserdasen yaḍnin igan ammi gerden s tawda:

– Iεeqqub! Ffeγ seg usasu! Hat ur ak-riγ awed yan uγilif. Widdeγ ayed igan icenga-inu! kwenni ad ur akw ttemmectagem!

Iffeγ Iεeqqub, isal Umaxdac ibedda ammas n usasu. Wenna immectegen ineγ-t.

Γas sellan medden i udida n ugari, ddahdan. Aγulen amm tewrut n wulli ikcem wuccen. Imxezniyen illan g yimi, rulen ad nn-sslekmen aneγmis i wiyaḍ nn-isulen g teqcelt. Ffγeγ-d γer imi n usasu. Nitni, kan-i-d tidiwwa. Wenna utiγ irdel γef wudem. Ar ten-gemmreγ amm yiwtal iduyen.

Kigan n yimxezniyen ayed nγiγ. Gbiγ tidiwwa-nnsen s ugari. Ḍran amm yixencay. G tnila-nnes, Umaxdac inγa akw iserdasen illan g usasu.

Anniγ Umaxdac iffeγ-d. Irẓem i tgarit g yigenna. Tasukt tura. Tetkar s waḍu n ugari. Nka tiγwerdin i usasu. Nezdi tarula γer asif n Tdeγwt. Nameẓ abrid ammas n yigran s trula allig neṛmi. Arwa nerwi issemdez-i kigan.

Nbedda ad nesgunfu niselli i wawal n yan umxezni, inna i yimeddukkal-nnes: – Hu-ten. Llan s sin!

Nerfa, neγli asif. Ukiγ d uqraf n waman i-d-igulan ifadden d i titiwat izdin n wul-inu. Γas nekcem igran, nezdi tarula allig ngula yat tasukt ger snat tadderwin. Nuji agadir neqqim. Imxezniyen sulen da aγ- ttnadan. Sellaγ i yishuwwan n uqebḍan n Tinγir d i yimxezniyen ar t- reggmen.

Iduy Umaxdac, inna: – Matta uya?

Neẓra yan urgaz ini-d taserdunt, izdi-d tawada γer tnila-nneγ. Igula-d nilaγ iggez-d seg userdun. Irẓem tiflut n taddart mi neffer ddawas. Iseksu-d ẓarneγ, inna-aγ:

– Kwenni ayed irwin Tinγir?

Inna-as Umaxdac:

– I ma k-igan? Inna:

– Kecmat! Han imxezniyen, icekkamen d yiserdasen n Fransa aγen akw tamazirt.

Neqqima nelseγ g ugadir. Inna diγ:

– Ar mek diγ tram a kwen-amẓen, teqqimem dinnaγ. Nek ur i digun iddi ka! Nemseksiw. Nekcem. Netta ard ittekkes taγrart γef tadawt n userdun- nnes. Γas tegra-aγ teflut γer agensu n tgemmi, niselli i wawal n yimxezniyen d-ikkan tasukt.

Inna-yaγ-d:

– Ffγat γer … Issken-aγ tiflut n wurti s ufus-nnes. Nerẓem tiflut, neffeγ ẓares. Neffer deffer n snat tezdayin. Ildi-d Umaxdac amrig-nnes. Inna:

– Mek d-kecmen ad aneγ-gemren amm tsekwrin! Nniγ-as:

– Mek d-kecmen, neγli agadir n wurti!

Nsella i yiwen g yimxezniyen ar isawal.

Inna:

– Da nettnada sin yiremmaγen. Ur ten-tannid?

– Imγewwγen?

– Rwin Tinγir. Ataṣ ayed nγan!

– Ha-k teẓrid. Imekday d-aγuleγ seg tisirt. Maka γaleγ is sellaγ i ka n ummerxwec g yigran tama n wasif diddaγ g d-zriγ. Waqila nitni.

-Tarwa n yiyḍan!

Nsella i umneqqer n yiḍarren-nnsen g tsukt d i teflut n taddart allig teqqen. Inna:

– Ddaw akw medden! Imazdaren!

Inna-aγ:

– Mer akw gin yimezdaγ amm kwenni is ur iqqimi awed yan Uṛumi g tmazirt-ddeγ.

Irnu diγ imiq, inna:

– Ssurfat-i! Tameṭṭut tedda s γur bab-nnes ….

Izmummeg. Ifest. Nfest.

Issenwa-aγ-d tiglay nitenti d watay. Nečča nsew ngen.

Tifawt, ur ta d-tuliy tafuyt, nenker ur ta d-ifafa. Nufa-d g yimi n uḥanu g negna yat tissufra. Degs aγrum, tiyni, udi, taxriṭ n tmessi, atay d yan wana n yidukan.

Yusi Umaxdac tissufra nameẓ abrid γer adrar. Amdaz yaγ amm tefsut agensu n wulawen-nneγ iffuden tilelli …

_____

* Le même fragment a été publié sur le site de l’Association Tilelli que je remercie.

Advertisements